“Repensar o futuro das Cidades: as árbores están revolucionando as cidades no mundo”, é o lema deste ano 2018 que seleccionou a FAO (Organización das Nacións Unidas para a Alimentación e a Agricultura), centrándose no papel das cidades no futuro e en especial na protección dos bosques urbanos. O proxecto LIFE Lugo+Biodinámico encaixa perfectamente neste enfoque, no desenvolvemento de barrios resilientes e multiecolóxicos, promovendo e conservando bosques urbanos a través das súas accións.

O Ministerio de Agricultura, Pesca e Alimentación celebrou o 7 de xuño as xornadas centradas en “Bosques Urbanos e Saúde nas Cidades. Novas Perspectivas”, que se dirixiu a técnicos e xestores de concellos, así como titulados na materia.

O proxecto LIFE Lugo+Biodinámico paricipou por invitación do Ministerio nestas xornadas, dando a coñecer o proxecto aos asistentes e as súas medidas, de modo que poidan tomarse como referencia e replicalas noutras áreas urbanas. As investigadoras da Universidade de Santiago de Compostela, Esther Fernández e Cristina Eimil, impartiron a ponencia que foi acollida con grande interese.